"පැන මඩ කඩිති වැව් තාවලු වැහි කාලේ
පෙන්නා මග නොමග නොවැටී යන තාලේ
සිප් කිරි පෙවූ මූසිලයින් උඩු මාලේ
අපෙ ගුරුතුමා යයි තාමත් ඉස්කෝලේ"
විශාරද සුනිල් එදිරිසිංහයන්ගේ මෙම ගීතය කන වැකෙත්ම අපට මතකයට නැගෙන්නේ අපේ ගුරුවරුන් ය.සැබැවින්ම ඇතැම් ගුරුවරුන් අපේ ජීවිතය තුළ ඉතාමත් සමීපයි.විෂය කරුණුවලට ම සීමා නොවී ජීවිතය කියාදුන් ගුරුවරුන් අප කාගෙත් ජීවිතවල සිටී.පොළෝ ගැබේ සැගවී ඇති මැණික් ඔපදමන්නාක් මෙන් ගුරුවරුන් ද දරුවන්ගේ ජීවිත දීප්තිමත්ව හැඩ ගස්වයි.ගුරු වෘත්තිය වැටුප් ලබන රැකියාවකට එහා ගිය සමාජ මෙහෙවරකි.වගකීමකි.එවන් ලොව පුරා වෙසෙන ගුරුවරුන් සිහිකරන දිනය ලෙස අද දිනය සැළකේ.
ජාත්‍යන්තර ගුරු දිනය සෑම වසරකම ඔක්තෝම්බර් 05 වනදා සමරනු ලැබේ.මේ දිනයේදී සිසුන්ගේ අනාගතය ගොඩ නැගීමට කැපවෙන ලොව පුරා සිටින ගුරුවරුන්ට ගෞරව දැක්වීම සහ ඔවුන්ගේ මෙහෙවර ප්‍රශංසාවට ලක් කිරීම සිදු කරයි.ජාත්‍යන්තර ගුරු දිනය 1966 දී ජාත්‍යන්තර කම්කරු සංවිධානය (ILO) සහ එක්සත් ජාතීන්ගේ අධ්‍යාපනික, විද්‍යාත්මක සහ සංස්කෘතික සංවිධානය (UNESCO) එක්ව නම් කර තිබේ.UNESCO සංවිධානය මෙම දිනය නම් කිරීමට කටයුතු කිරීම නිසා ගුරුවරුන්ගේ අයිතිවාසිකම් සහ වගකීම් සම්බන්ධයෙන් මෙන්ම ඔවුන්ගේ මූලික සූදානම සහ වැඩිදුර අධ්‍යාපනය වැනි ක්‍රියා සඳහා මාර්ගෝපදේශ ලබා දීමේ දිනයක් ලෙස ද මෙම දිනය හැදින්වෙයි.ගුරුවරයෙකුට තම සිසුන්ගේ පැවැත්ම කෙරෙහි පරිවර්තනීය බලපෑමක් ඇති කිරීමට විශිෂ්ට අවස්ථාවක් හිමි වේ.ඔවුන් තම සිසුන්ගේ දීප්තිමත් අනාගතය සැකසීමට සහ පුද්ගල තෘප්තිය ලබා දීමට උපකාර කිරීමෙහි මහගු කාර්යයක් ඉටු කරන බව ද අප හොදින්ම දන්නා කාරණයකි.UNESCO සංවිධානය ප්‍රකාශ කළේ ගුරුවරුන් අපගේ ජීවිතවලට ලබාදෙන දායකත්වය සැමරීම සහ ගෞරව දැක්වීම සඳහා මෙම දිනය ජාත්‍යන්තර ගුරු දිනය ලෙස වෙන් කරන බවයි.මෙවර 2024 ජාත්‍යන්තර ගුරු දිනයේ තේමාව වනුයේ " ගුරු හඬ අගය කිරීම: අධ්‍යාපනය සඳහා නව සමාජ ගිවිසුමක් කරා ” යන්නයි.
කුඩා කාලයේ අපගේ දෙමාපියන්ගේ ඇසුරේ හැදී වැඩී පසුව අපි බාහිර සමාජය ලෙස ප්‍රථමයෙන් හදුනාගන්නේ පෙර පාසලේ හෝ පාසල තුළ අපට හමුවන ගුරුවරුන් ය.ඔවුන් අපේ දිවියේ මූලික අඩිතාලම සකසයි.අධ්‍යාපනික කරුණු පමණක් නොව ජීවිතය ද කියා දෙන ගුරුවරුන්ට කෘතගුණ සැළකීම ශිෂ්ටසම්පන්න සමාජයක කාර්යයභාරයකි.
බුදු දහම තුළ ද "ගුරුවරයා" යන භූමිකාව මහත් අගය කොට සළකා තිබේ.“ඕවාද සිප්ප දානේන සික්ඛා පේති මමං ගරු සගාරවේන චිත්තේන අහං වන්දාමි තං ගරු” පාදනමස්කාර වන්දනීය ගරු බුහුමන් ලැබීමට තරම් උතුම් යන්න පෙන්වා දෙන තථාගතයන් වහන්සේ සිඟාලෝවාද සූත්‍ර දේශනයේ දී ආචාර්යවරුන් දකුණු දිසාවට සමාන කරමින් ශිෂ්‍යයන් විසින් ආචාර්යවරුන් හට විය යුතු යුතුකම් පෙන්වා දී තිබේ. වචනයෙන් පමණක් නොව ක්‍රියාවෙන්ම ආචාර්ය වන්දනය සිදු කරන බුදුරදුන් නිර්වාණ අවබෝධයෙන් අනතුරුව ප්‍රථමයෙන්ම වැඩම කරනුයේ ආරාම කාලාම උද්දකරාම පුත්ත යන දෙගුරුන් සොයා ගෙනයි.
මිනීමරුවෙකු අපරාධකරුවෙකු වී සමාජයෙන් ගැරහුම් හිමි වීමට නියමිත දරුවෙකු එයින් මුදවාගෙන නිවැරදි මාර්ගය පෙන්වා දෙමින් ගුණවත් චරිතයක් කරන්නේ ගුරුවරුන් ය.ඉතින් එබැවින් ජීවිතයේ මඩ ගොහොරු පසු කර අපට ජීවිතය දිනන්නට සවිය දුන් දෙවැනි මාපියන් වන ගුරුවරුන්ට අප කළගුණ සැළකිය යුතුය.ඔවුන් සිදු කරන්නා වු එම සමාජ මෙහෙවර අගය කළ යුතුය.අද දිනය වෙන්වන්නේ එයටයි.එසේ නම් තම ජීවිතය කැප කරමින් දරුවන්ගෙ නැණ පහන් දල්වා ජීවිත එළිය කරන ලොව පුරා වෙසෙන සියලු ගුරුවරුන්ගේ සේවය ඇගයෙන ලෝක ගුරු දිනයක් වේවා💜️
Leo Nikeshala Kulawansha
Second Year
Faculty of Arts
