මීලාදුන්- නබි දිනය
මීලාදුන් - නබි දිනය යනු , ලොව පුරා සිටින ඉස්ලාම් බැතිමතුන් මහත් බැතියෙන් සමරන වැදගත්ම ආගමික උත්සවයකි. මෙම දිනයෙන් සමරනු ලබන්නේ ඉස්ලාම් ආගමේ ශ්‍රේෂ්ඨත ම නායකයා ලෙස සැලකෙන ශුද්ධ වූ මුහම්මද් නබිතුමාගේ උපතයි. මෙම උත්සවය හුදෙක් උපන්දින සැමරුමක් පමණක් නොව මුහම්මද් නබිතුමා ලොවට ගෙන ආ සාමය, දයාව, කරුණාව සහ සහජීවනය වැනි උදාර ගුණාංග සිහිපත් කිරීමකි.
ක්‍රි.ව. 570 දී පමණ අරාබියේ මක්කම නගරයේ උපත ලැබූ මුහම්මද් නබිතුමාගේ ජීවිතය පුරා ම මානව වර්ගයාගේ අභිවෘද්ධිය වෙනුවෙන් කැප විය. එවකට පැවති අසාධාරණ සමාජ ක්‍රමයන්ට එරෙහිව නැගී සිටි එතුමා සියලු මිනිසුන් එක හා සමාන බවත් , කිසිවකුත් කිසිවකුටත් වඩා උසස් හෝ පහත් විය නොහැකි බවත් ලොවට පෙන්වා දුන්නේය. කුරානය තුළින් එතුමා ලොවට දායාද කළ දහම, සත්‍යය සහ ධර්මිෂ්ඨකම පදනම් කරගත් ජීවන මාර්ගයක් පෙන්නුම් කළේය.
මෙම උත්සවය සමරන ආකාරය රටින් රටට වෙනස් වුවත් එහි මූලික අරමුණ එක හා සමානයි. මුස්ලිම්වරු මුහම්මද් නබිතුමාගේ ජීවිතය හා ඉගැන්වීම් ගැන වැඩිදුරටත් අධ්‍යයනය කරමින් යාඥාවන් සහ ආගමික දේශනවලට සහභාගී වෙති. දානය දීම, දුප්පත් අයට උදව් කිරීම සහ ආගමික ග්‍රන්ථ කියවීම මෙම දිනයේ දී බහුලව සිදු කෙරේ. මෙය සමාජයේ අන්‍යයන් සමඟ සහෝදරත්වය සහ එකමුතුකම තහවුරු කර ගැනීමට හොඳ අවස්ථාවක් සපයයි.
මීලාදුන්-නබි දිනය හුදු ආගමික උත්සවයක් ලෙස පමණක් නොසැලකිය යුතු ය. එය වර්තමාන ලෝකයට ඉතා වැදගත් පණිවිඩයක් ගෙන එයි. විවිධ ජන කොටස්, ආගම් සහ සංස්කෘතීන් අතර අසමගිය වැඩිවන මෙවන් යුගයක මුහම්මද් නබිතුමාගේ දයාබර සහජීවන පණිවිඩය අන් කවරදාටත් වඩා අගනේය. එතුමාගේ ඉගැන්වීම් තුළින් අපට ඉගෙන ගත හැක්කේ සාමය, සහජීවනය සහ මානව ගරුත්වය මත පදනම් වූ ලෝකයක් ගොඩනැගීමටයි.
මීලාදුන්- නබි දිනය සැමරීමෙන් අපි අලුතෙන් ප්‍රබෝධයක් ලැබිය යුත්තේ එකිනෙකාට ගරු කරමින් සහ එකිනෙකාගේ අයිතිවාසිකම්වලට ගරු කරමින් ජීවත් වීමටයි. මුහම්මද් නබිතුමා ගෙන ආ පණිවිඩය වන්නේ දයාවෙන් සහ අවබෝධයෙන් පිරිපුන් සමාජයක් ගොඩනැගීමයි. එම උතුම් පණිවිඩය අප සැමට අනුගමනය කළ හැකි නම් අපට වඩාත් සාමකාමී සහ සමෘද්ධිමත් ලෝකයක් නිර්මාණය කළ හැකිය.
