අනතුරකට පෙර සූදානම...
2015 දෙසැම්බර් මාසයේ දී එක්සත් ජාතින්ගේ මහා මණ්ඩලය විසින් නොවැම්බර් 5 වන දින ලෝක සුනාමි දැනුවත් කිරීමේ දිනය ලෙස ප්‍රකාශයට පත් කරන ලදී. එය සුනාමි පිළිබඳව දැනුවත් කිරීම සහ ඊට එරෙහිව සූදානම් වීමේ ගෝලිය සංස්කෘතියක් ප්‍රවර්ධනය කිරීම මූලික අරමුණ කරගෙන ඇත. මෙම සංකල්පය ජපානය තුළින් බිහි වී ඇත. මෙවර සුනාමි දැනුවත් කිරීමේ දිනයේ තේමාව වන්නේ, 'ප්‍රතිවිරෝධි අනාගතයක් සඳහා අසමානතාවයට එරෙහිව සටන් කිරීම' යන්නයි.
දහස් ගණන් වූ ජීවිත වලට එල්ල විය හැකි ප්‍රබලම ආපදා තත්ත්වයක් ලෙස සුනාමි හඳුන්වා දිය හැකිය. මුහුදේ හදිසි කැළඹීමක් නිසා ඇති වන රළ මාලාවක් ලෙස 'සුනාමි' යන්න සරලව ම අර්ථ දැක්විය හැකිය. නමුදු සුනාමි දුර්ලභ ය. එහෙත් අනෙක් ආපදා තත්ත්වයන්ට සාපේක්ෂව මෙමගින් ජීවිත අහිමි වන සංඛ්‍යාව ඉතා අධික ය. සුනාමි අනතුරු සම්බන්ධයෙන් ලොව පුරා ජනයා දැනුවත් කිරීම මෙන් ම ස්භාවික ආපදා වලින් සිදුවන විනාශය අවම කර ගැනීම සඳහා පූර්ව අනතුරු ඇඟවීමේ පද්ධතිවල වැදගත්කම අවධාරණය මෙම සුනාමි දැනුවත් කිරීමේ දිනය තුළින් බලාපොරොත්තු වේ.
සුනාමි අනතුරු ඇඟවීම සඳහා සුනාමි පූර්ව අනතුරු ඇඟවීමේ මධ්‍යස්ථාන නිර්මාණය කර ඇත. ඒ තුළින් සුනාමි ඇති වීමට පෙර අනතුරු ඇඟවීම් සිදු කරයි. පසුගිය ශත වර්ෂය තුළ මාරාන්තික සුනාමි 100 කට අධික සංඛ්‍යාවක් ලොව පුරා වෙරළ තීරයට පහර දී ඇත. 2004 වර්ෂයේ දෙසැම්බර් 26 වන දින ඉන්දියන් සාගරේ ඇති වූ මාරාන්තික ම සුනාමි ව්‍යසනය මේ සඳහා කදිම නිදසුනකි. එමඟින් ජීවිත 228,000 ක් පමණ අහිමි වූ බව වාර්තා තුළින් පැහැදිලි වේ.
සුනාමි දැනුවත් කිරීමේ දිනය තුළින් නැවත නැවතත් අවධාරණය කරනුයේ, අනතුරකට පෙර සූදානමයි. මෙහි දී යෝධ රළ මඟින් ඇති කරන අවදානම අවම කර ගැනීම සහ ප්‍රජා සූදානම වැඩි දියුණු කිරීම පිළිබඳ මූලික අවධානය යොමු කළ යුතුය. ලෝක සුනාමි දැනුවත් කිරීමේ දිනය තුළ දී සියලු ම ජනතාව සහයෝගිව අසමානත්වයෙන් මිදී ජිවිතයක සුරක්ෂිතතාව උදෙසා කටයුතු කළ යුතුය.
ජීවිතයක වටිනාකම උදෙසා සියලුම ගෝලිය ජනයා සාධාරණයක් එකතු කළ යුතුය.
Leo Umesha Hansanie
First Year
Faculty of Arts
University of Colombo
