ශ්රී ලාංකීය රසික හදවත් මියුරු ස්වරයෙන් ස්පර්ශ කරමින් පුරා දශක හයක් සිය අනභිභවනීය හඬින් කලාකෙත අස්වැද්දූ හෙලයේ ගීත කෝකිලාවිය හෙවත් හෙළ ගී රැජිණිය, ප්රවීණ ගායන ශිල්පිනී කලාශූරී ලතා වල්පොල මහත්මිය ගේ 89වෙනි ජන්ම දිනය අදට යෙදී ඇත.
සිය සහජ උරුමයක් ලෙසින් උපතින්ම හිමි වූ ගායන කෞශල්යයක් ද සමගින් වර්ෂ 1934 නොවැම්බර් මස 11 වන දින උපත ලැබූ ඇගේ මුල් නම වූයේ රීටා ජෙනෙවි ප්රනාන්දුය. පල්ලියේ ගායක කණ්ඩායමේ සාමාජිකාවක් ලෙස ගායන දිවිය ඇරඹූ ඇය පසුව ගුවන් විදුලි ගීත ගායනයට පිවිස ඉතාම කෙටි කාලයක් තුළ දැක්වූ දක්ෂතා නිසා චිත්රපට පසුබිම් ගීත ගායනයට ඇයට අවස්ථාව සැලසී ඇත. සුසිල් ප්රේමරත්න, සී. ටී ප්රනාන්දු, කාලිදාස කුරුකුලසූරිය වැනි ප්රවීණයන්ගෙන් ලත් ආභාෂය ද සමග දිනෙන් දින කලා ලෝකය තුළ දීප්තිමත් වන්නට ලතා වල්පොල මහත්මියට ඉඩහසර සැලසී ඇත. තවද ධර්මදාස වල්පොල මහතා සමග අතිනත ගැනීම ද එතුමිය ගේ ගායන දිවිය තුල තවත් දිගු ගමනකට මග විවර වීමක් වැනි ය.
චිත්රපට රැසකට පසුබිම් ගීත ගායනයෙන් එක්වූ ඇය ජනාධිපති සම්මාන, සරසවි සම්මාන මෙන්ම දීපශිකා සම්මානය, රණතිසර සම්මානය, කලාශූරී සම්මානය සහ වීර විදහන රන්සිළු සම්මානය වැනි කලාකරුවකුට හිමිවන ඉහළම සම්මාන වලින් ඇය පිදුම් ලබා ඇත. එමෙන්ම ඇයගේ ගායන දිවියේ ස්වර්ණ ජයන්තිය ඇගයීම වෙනුවෙන් "ලතා රන් රස ප්රණාම" යනාදි අග්රගණ්ය ඇගයීම් රැසකට පාත්ර වීමට තරම් ඇය උත්කෘෂ්ට කලා ශිල්පිනියක් ලෙස ස්වකීය දක්ෂතා පිළිබිඹු කර ඇත.
"රූ රැසේ අඳිනා ලෙසේ" "රන්වන් කරලින් පැසිලා" "කළු කැළණි නදී" "මල්බර හිමිදිරියේ" "ලෝ අඩ නින්දේ" "සැලළිහිනි කොවුල්" වැනි ගීත අදටත් ඇයටම ආවේණික හඬ මාධූර්යයෙන් අපගේ දෙසවන් පුරා රැව් පිළිරැව් දෙනු ඇත. මේ අයුරින් මෙරට සංගීත ක්ෂේත්රයේ නොමැකෙන නාමයක් සනිටුහන් කළ කලාශූරී ලතා වල්පොල මහත්මිය සැබැවින්ම අප රටට අගනා සම්පතකි. එබැවින් ඇයට නිදුක් නිරෝගී දීර්ඝායුෂ සපිරි සුබම සුබ ජන්ම දිනයකට ආසිරි එක් කරන්නෙමු.
Leo Nisansala Pathirana
Second Year
Faculty of Arts
University of Colombo