තනිවම ජීවත් වීමට ඇලුම් කරන මෙන්ම ඉතා ගුප්ත චරිත ස්වභාවයකින් යුතු කාන්තාවන් සිග්මා කාන්තාවන් ගණයට අයත් වනවා. සමාජය ගැන තැකීමක් නොකරන, ලෝකයා තමන් ගැන සිතන්නේ කෙලෙසකද යන්න පිළිබද කිසිදු සැළකිල්ලක් නොදක්වන මොවුන් හට පිරිමින්ද පුංචි බියක් දක්වනවා යැයි සමාජමය මතයක්ද පවතියි.
ඉතාම සරලව ගතහොත් මොවුන් සමාජය තුල ඉතාම නිශ්ශබ්ද භූමිකාවක් ගතකරයි. මොවුන් වැඩිය කතාබහ නොකරන වැඩිය සිනා නොවන තමන්ගෙ පාඩුවෙ තමන්ගෙ වැඩේ කරගෙන සිටින කාන්තාවන් කොට්ඨාසයක්. මේ කාරණය නිසාම සිග්මා ලක්ෂණ සහිත කාන්තාවන්ව ලෝකයා වටහා ගන්නේ ඉතාම වැරදි අදහසකිනි.
ඉතින් ඔබත් සිග්මා කාන්තාවක්ද.....?
එන්න... මේ ලිපියෙන් අපි ඒ ගැන කතා කරමු...
සිග්මා ලක්ෂණ සහිත කාන්තාවන් ස්වාධීනත්වය අතින් ඉහළ වේ. සිග්මා කාන්තාවන් alone wolf එහෙමත් නැතිනම් හුදකලා වෘක ධේනුව ලෙසින් හැදින්වීමටත් ප්‍රධාන හේතුවක් වන්නේ ඔවුන් තුල පවතින ස්වාධීනත්වයයි. ආර්ථික, සාමාජීය, මානසික ආදී සෑම අතකින්ම ඇය ස්වාධීනය. ඇයට යමක් කිරීමට සිතුනහොත් අන් කිසිවෙකුගේවත් තක්සේරු කිරීම් හෝ උපකාර ඇයට අවශ්‍ය නොවේ. එසේම හැමෝම කරන දේවල් ඔවුන් නොකරයි. අපේ භාෂාවෙන් නම් එය රැල්ලට යාම, තව කෙනෙක් follow කිරීම් වැනි දේ කෙරෙහි ඇය උනන්දු නොවෙයි. තමන්ට සුවපහසු නම් තමන් කැමති නම් තමන්ට හැකියාව පවතී නම් සිතුනු ඕනෑම දෙයක් සිදු කිරීමට සිග්මා කාන්තාවන් පසුබට නොවෙයි.
වෙනස් විදිහට සිතන, වෙනස් විදිහට වැඩ කරයි. සිග්මා කාන්තාවන්ගේ මෙකී වෙනස් ස්වරූපය දකින සමහරෙක් ඇය වෙනස් චින්තනයක් ඇති අද්විතීය කාන්තාවක් ලෙසින් දුටුවත් තවත් සමහරෙක් හට ඇයව පේන්නට බැරි වෙන්නත් පුලුවන්. නමුත් මුලු ලෝකයකටම ඇයව පේන්නට බැරි කාන්තාවක් උවත් ඒ ගැන සිතා ඔවුන් කිසි විටකත් මානසිකව කඩා වැටීමක් සිදු නොවෙයි.
එසේම මොවුන් තමන්ට නොගැළපෙන, තමන්ට නිසි ගෞරවයක් නොලැබෙන හෝ තමන් ගැන කිසිදු සැළකිල්ලක් නොදක්වන, සරල භාෂාවෙන් තමන්ව ගණන් නොගන්නවා යැයි සිතෙන තැනක එක් තප්පරයක් හෝ නොසිටියි. වහාම එවැනි සම්බන්ධතා වලින් ඉවත්ව යයි. එය නෑදෑ සබදතාවක් හෝ වේවා, අසල්වැසි සබදතාවක් හෝ වේවා, මිත්‍ර සබදතාවක් හෝ ප්‍රේම සබදතාවක් හෝ වේවා මේ කුමක් වුවත් එය තමන්ට සුදුසු නැතැයි සිතෙන්නේ නම් ඇය තමන්ගේ තත්ත්වය රැකගෙන වහාම එතනින් ඉවත්ව යයි.
තමන්ට කල හොදක් හෝ වරදක් ඇය කිසි විටක පහසුවෙන් අමතක නොකරයි. තමන්ට හෝ තම හිතවතෙකුට කිසියම් අසාධාරණයක් වුවහොත් එය සිදු කල පුද්ගලයාටත් එවැන්නක්ම සිදු කරන තෙක්ම ඔවුහු ඒ දේවල් හොදින් සිහියේ තබාගෙන සිටිති. වචනයකින් කරන හිත් රිදවීමක් වුවත් මොවුන්ට ඉතාම ප්‍රභල දෙයක් වෙයි. එලෙසම, තමන්ට කල උපකාරයන්ද ඔවුන් කිසිවිටකත් අමතක නොකරයි. එම උපකාර, එම මිනිසුන් ඔවුන් හොදින්ම සිහියේ තබාගෙන සිටියි. සිග්මා කාන්තාවන්ට හොද අතින් මෙන්ම නරක අතින් සිදු කරන සෑම දෙයකටම හොද අතින් හෝ නරක අතින් කළගුණ සැළකීමටද මොවුන් අමතක නොකරයි.
එසේම හැම තැනකදීම යුක්තිය සාධාරණත්වය පැවතිය යුතු බව මොවුන්ගේ මතයයි. එසේම පිරිමියා මුල් කරගත් සමාජ ක්‍රමය මොවුන් ප්‍රතික්ෂේප කරයි. කිසිවෙක් තමන්ට පීඩනයක් එල්ල කරනවට ඇය අකමැතිය. එසේම කිසිවෙකුගේවත් නීති රීති වලට අනුකූලව එක් සමාජ රටාවකට කොටු විසීමට මොවුන් අකමැති අතර මොවුන් නිදහසේ තමන්ට රිසි පරිදි ජීවත් වීමට කැමැත්තක් දක්වයි. එසේම නිදහස කෙතරම් භුක්ති වින්දත් මොවුන් තමන්ගේ සීමාව හොදින් දනියි. ප්‍රේමසම්බන්ධයක් තුල උවත් එය එසේමය. පුරුෂයාගේ නීති වලට අවනතව ජීවත් වීමට ඇය කිසිසේත්ම කැමැත්තක් නොදක්වයි. කොටින්ම එවැනි සම්බන්ධතා වලින් ඔවුන් ඉවත්ව යයි.
සිග්මා කාන්තාවන් තුල දක්නට ඇති තවත් ලක්ෂණයක් වනුයේ ඇය අන් අයගේ උදව් ලබා ගැනීමට මැලිකමක් දැක්වීමයි. බැරිම අවස්ථාවකදී උදව් උපකාර ඉල්ලා සිටියත් ඇය තමන්ට උපරිමයෙන් ස්වශක්තියෙන් තම ජ්‍යග්‍රහණය ලගා කරගැනීමට උත්සහ දරයි.
සිග්මා කාන්තාවන් ඇසුරු කරන්නේ ඉතාම සීමිත යහලුවන් ප්‍රමාණයකි. මොවුන්ගේ සමාජ කවය ඉතාම සීමිතය. තම යහලුවන් ලෙස ඇය තෝරාගන්නේ තමන්ට හොදින් දැනුන යහලුවන් පමණි. බොහෝ යහලුවන් ප්‍රමාණයක් සමග මිත්‍රකම් පැවැත්වීමට ඇය ඇල්මක් නොදක්වයි. ඇගේ සමාජ කවය තුල සිටින ඉතාම සීමිත යහලුවන් ප්‍රමාණය ඇයට අතිශයින්ම ප්‍රමාණවත් වේ. මන්ද ඔවුන් මිතුරන් තෝරාගන්නේ බොහෝ තෝරාබේරාගෙන නිසාය. එසේම ඔවුන් සමග හොදින් කතා බහ කර ඇය කල් ගෙවුවද තමන්ට එතරම් හුරුපුරුදු නැති මිතුරන් පිරිසක් ඉදිරියේදී නිහඩ වෙයි. මේ නිහඩබව ඇගේ ජීවිතයේම කොටසක් බව ඔවුන්ට අගවයි. මේ හේතුව නිසාම ඔවුන්ව හරියට තේරුම් ගැනීමට කෙනෙකුට අතිශයින්ම අපහසුය. ඇගේ සිතිවිලි කෙබදුද, ඇය කවර ආකාරයේ කාන්තාවක්ද කියා ඇයව දුටු පමණින්ම නිගමනයකට එළඹීම අපහසු වේ. නමුත් තමන්ට දැනුන පුද්ගලයින් සමග මොවුන් ඉතාම සමීපව ඉතාම සැහැල්ලුවෙන් කටයුතු කරයි. එනම් ඇය ඇයම වන්නේ ඇය කැමති, ඇය තදින්ම විශ්වාස කරන කිහිපදෙනා ඉදිරිපිටදී පමණකි.
සිග්මා කාන්තාවන් යනු තේරුම් ගැනීමට අපහසු කාන්තා කොට්ඨාසයකි. ඇය තරමක් අභිරහස්ජනක කාන්තාවක් වෙයි. යම් විටක ඇය අන් අය සමග හොදින් සිටියත් ඔවුන්ට අකමැති වීමට පුලුවනි. නමුත් එය අන් අයට නොපෙන්වා තම සිත තුලම තබාගනියි. ඇය සාර්ථකයි නමුත් නායකත්වය පසුපස හබා නොයයි. මොවුන්ගේ ජීවන රටාව අද්විතීය එකක් නමුත් එය ගුප්ත බවක් උසුලයි.
ඇය තමන්ට යමක් ලැබෙන්නට තිබෙනවා නම් එය ලැබෙන බවත් නොලැබෙන්නට තිබෙනවා නම් එය නොලැබෙන බවත් තේරුම්ගෙන ජීවත්වෙයි.
අවසන් වශයෙන් සිග්මා කාන්තාවන්ගේ ලක්ෂණ ඉතා කෙටියෙන් මෙලෙස දැක්වීමට හැකිය.
💠 ඇය ස්වාධීනයි.
💠 තරමක ගුප්ත ස්වභාවයකින් යුක්ත වෙයි.
💠 ඇය ඇගේ තත්ත්වයට වඩා කරුණාවට මුල් තැන දෙයි.
💠 ඇය දක්ෂ නමුත් නායකත්වය දීමට එතරම් උනන්දු නොවෙයි.
💠 ඇය අන් අයට ඊර්ෂ්‍යා නොකරයි.
💠 ඇය ඇගේම නියමයන්, නොන්දේසි යටතේ ජීව්තය ගත කරයි.
